Աֆղանստանում կործանված մոլդովական ուղղաթիռի օդաչուներից մեկին սպանել են թալիբները
Աֆղանստանում վթարի ենթարկված Մի-17 մոլդովական ուղղաթիռի օդաչուներից մեկը զոհվել է թալիբների հրետակոծման ժամանակ: Այս մասին հայտարարել են Մոլդովայի քաղաքացիական ավիացիայի պետական վարչությունից:
55-ամյա օդաչու Օլեգ Գրոզան զոհվել է կրծքավանդակի շրջանում չորս հրազենային վերքերի հետևանքով: Թալիբները հրետակոծել են ուղղաթիռը: Այդ պատճառով այն հարկադիր վայրէջք է կատարել, հաղորդում է ՏԱՍՍ-ը:
Բացի այդ, հայտնի է դարձել, որ օդաչուի մարմինը տեղափոխվել է Աֆղանստանում գտնվող գերմանական հիվանդանոց, որտեղ նրա ինքնությունը պարզել են Valan International Cargo Charter ընկերության ներկայացուցիչները, որին պատկանում էր խոցված ուղղաթիռը: Այժմ հանգուցյալի մարմինը կտեղափոխվի Մոլդովա, որտեղ նրան կհուղարկավորեն:
Հիշեցնենք, որ Աֆղանստանում ԱՄՆ կառավարության հետ պայմանագրով աշխատող մոլդովական ուղղաթիռը կործանվել է նոյեմբերի 24-ին այն բանից հետո, երբ Ֆարյաբ նահանգում խոցվել է թալիբների կողմից: Անձնակազմը վթարային ազդանշան է տվել և հարկադիր վայրէջք է կատարել: Ուղղաթիռում եղել է 21 մարդ՝ 18 ուղևոր և անձնակազմի երեք անդամ: Վթարի վայրում չորս մարդու մարմին է հայտնաբերվել, իսկ մյուսներին պատանդ են վերցրել թալիբները: