Ինչ փուլում է Փաշինյանի որդու՝ հայ գերիների հետ փոխանակման գործընթացը
ՀՀ վարչապետ Նիկոլ Փաշինյանը քարոզարշավի ընթացքում իր ելույթներից մեկում հայտարարեց, որ համապատասխան մարմիններին հանձնարարել է՝ ադրբեջանական կողմին պաշտոնապես փոխանցեն իր առաջարկը, ըստ որի՝ ինքը պատրաստ է որդուն՝ Աշոտ Փաշինյանին, պատանդի կարգավիճակով ուղարկել Բաքու՝ հայ բոլոր գերիների վերադարձի պայմանով: Պարզելու համար արդյոք փաստաթղթերը պատրաստվել և ուղարկվե՞լ են Ադրբեջան, թե՞ ոչ և, առհասարակ, ինչպե՞ս է փաստաթղթավորվելու գործընթացը և դրվելու՝ Աշոտ Փաշինյանին հայ գերիների դիմաց փոխանակելու հարցը՝ ԼՈՒՐԵՐ․com-ը հարցում էր ուղարկել կառավարութուն, ինչին ի պատասխան կառավարությունից հայտնել են, որ Փաշինյանը քարոզարշավի ընթացքում սպառիչ պատասխան է տվել։ Հավանաբար նկատի ունեն այն, որ դիմել են պատկան մարմիններին, սակայն դեռևս որևէ գործընթաց չի սկսվել։
Հետաքրքիր է՝ արտահերթ խորհրդարանական ընտրություններում իշխող ուժի հաղթնակից հետո էլ Փաշինյանը կշարունակի՞ պնդել իր առաջարկը և պատրաստ կլինի՞ փոխանակման, թե ոչ։
Հիշեցնենք, որ Նիկոլ Փաշինյանը՝ հունիսի 9-ին, քարոզարշավի շրջանակում գտնվելով Շիրակի մարզում, հայտարարել էր․ «Երեկ ես հայտարարություն եմ արել, այսօր էլ մեր համապատասխան մարմիններին հանձնարարել եմ, որ ադրբեջանական կողմին պաշտոնապես փոխանցեն մեր առաջարկը՝ իմ որդին պատրաստ է պատանդի կարգավիճակով գնալ Բաքու՝ մեր բոլոր գերիների վերադարձի պայմանով: Հանկարծ չմտածեք, որ սա միակ գործիքակազմն է և հուսահատ քայլ է՝ մեր գերիների հարցը լուծելու համար։ Ուզում եմ բոլորդ իմանաք, որ այս ընթացքում շատ ինտենսիվ աշխատանք է տարվում, ես չեմ ուզում այդ աշխատանքը գնահատել, որովհետև այս թեմայով մի բան ավել ասելը կարող է ոչ անհրաժեշտ զարգացումներ առաջ բերել»,- նշել էր Փաշինյանը:
Սոնա Հարությունյան