Ես ասում էի, որ ճիշտ կլինի ԱԺ փոխնախագահը լինի «Պատիվ ունեմ» խմբակցությունից. Ալեն Սիմոնյան
«Քվեարկության գաղտնիությունը կպահեմ, իսկ ինչպես ասաց մեր խմբակցության ղեկավարը մենք կապահովվենք անհրաժեշտ նվազագույն ձայների քանակը, որպեսզի ԱԺ-ը շարունակի գործել»: Այս մասին այսօր՝ օգոստոսի 5-ին, ԱԺ-ում խորհրդարանի լրագրողների հետ զրույցում ասաց ԱԺ նախագահ Ալեն Սիմոնյանը:
Ազգային ժողովի նախագահ Ալեն Սիմոնյանը կարծում է, թե ճիշտ կլիներ, որ ԱԺ ընդդիմադիր փոխնախագահը լիներ «Պատիվ ունեմ» խմբակցությունից։
«Ես ասում էի, որ ճիշտ կլինի ԱԺ փոխնախագահը լինի «Պատիվ ունեմ» խմբակցությունից, բայց, ինչպես տեսաք, «Պատիվ ունեմ» ու «Հայաստան» դաշինքները համաձայնության են եկել, ուստի «Պատիվ ունեմ»-ն իր որոշումը կայացրել է»,-լրագրողների հետ զրույցում ասաց նա։
Հարցին՝ իր ընկեր Արթուր Վանեցյանի՞ն էր ակնարկում, երբ ասում էր, որ ցանկալի կլիներ «Պատիվ ունեմ»-ից լինի փոխնախագահը, Սիմոնյանն արձագանքեց. «Ընկեր ասելով ակնարկում ենք, որ մենք այնպիսի հարաբերություններ ունենք, որ քաղաքական առումով աշխատելը դժվա՞ր է լինելու, կամ լա՞վ է լինելու, ես կարծում եմ՝ ձեր հարցը տեղին չէ»։
«Մեր գործընկերներն այս պահի դրությամբ պատրաստ չեն այդ քննարկմանը: Մենք միշտ բաց ենք քննարկման համար, ես բազմիցս դիմել եմ, որ այդ քննարկումը տեղի ունենա, բայց մեր գործընկերները պատրաստ չեն այդ քննարկմանը, ուստի շարժվում ենք այնպես, ինչպես օրենքն է թելադրում»: ԱԺ-ում խորհրդարանի լրագրողների հետ զրույցում նշեց ԱԺ նախագահ Ալեն Սիմոնյանը՝ անդրադառնալով հարցին, թե արդյո՞ք քննարկել են ընդդիմադիր խմբակցությունների հետ հանձնաժողովների նախագահների թեկնածուների հարցը:
Եթե ընդդիմությունը որոշի իրեն հասանելիք հանձնաժողովների համար նախագահի թեկնածու չներկայացնել, ապա ԱԺ նախագահի խոսքով, դրանք մեխանիկորեն անցնում են իշխող խմբակցությանը: Կան հանձնաժողովներ, որոնք իշխանությունը գտնում է, որ պետք է անպայման լինեն իրենցը, ունեն որոշում: