Նիկոլ Փաշինյանը և Արցախի նախագահ Արայիկ Հարությունյանը ևս կհրավիրվեն քննիչ հանձնաժողով. Անդրանիկ Քոչարյան
Հստակ կանոնակարգված է՝ քննիչ հանձնաժովն ինչպես է ստեղծվում: Քննիչ հանձնաժողովի և նրա լեգիտիմության հետ կապված շատ հարցեր կան, որովհետև շատերը քննիչ հանձնաժողովում ցանկանում են տեսնել «քաղաքական բոլոլայի» միջավայր, բայց օրինակ մեր ապրիլյան պատերազմի քննիչ հանձնաժողովն այնպիսի աշխատանք տարավ, որ որևէ քաղաքական քննարկում տեղի չունեցավ: Այս մասին լրագրողների հետ զրույցում ասաց Անվտանգության և Պաշտպանության հարցերի հանձնաժողովի նախագահ Անդրանիկ Քոչարյանը՝ պատասխանելով հարցին՝ ի՞նչ ընթացքի մեջ է 44-օրյա պատերազմի հանգամանքները քննող հանձնաժողովը:
Պատգամավորը հայտնեց, որ Նիկոլ Փաշինյանը և Արցախի նախագահ Արայիկ Հարությունյանը ևս կհրավիրվեն քննիչ հանձնաժողով.
«Նիկոլ Փաշինյանն ինքն է նման պատրաստակամություն հայտնել, բոլոր պաշտոնյաներն էլ հենց իրենք են առաջարկել, որ հրավիրվեն քննիչ հանձնաժողով»,-ասաց Քոչարյանը:
Նրա խոսքով՝ տարիների ընթացքում, մինչ Ադրբեջանը սպառազինվում էր, Հայաստանը չի զինել իր բանակը.
«Հարցեր կան, որ մենք անպայման պետք է գնանք հետ, որպեսզի հասկանանք՝ այս պարտությունը որտեղից եկավ: Պարտությունը գալիս է, երբ լավ չես սպառազինված, երբ չես հասցրել բանակը պատրաստել այն մարտական գործողություններին, որին պատրաստվել է հակառակորդը, իսկ նա իր պատրաստվածությունը միշտ էլ ցույց է տվել, մենք հակաքայլեր ինչու՞ չէինք անում։ Երբ հարցեր ենք տալիս, ՊՆ նախկին նախարարը շիշը նետում է ուղիղ ամբիոն, սրանք հարցեր են, որոնց պետք է պատասխան տրվի: Սեյրան Օհանյանը դատապարտված է մի անգամ էլ գա այստեղ, որովհետև նա 7 տարի եղել է ՊԲ հրամանատար, 8 տարի եղել է ՊՆ նախարար, ամենաերկար պաշտոնավարած առաջին դեմքն է եղել, թե Արցախում, թե Հայաստանում»,-ասաց Քոչարյանը: