Մասնագետը նշել է մեջքի ցավի հիմնական պատճառը
Մեջքի ցավի հիմնական պատճառը մկանների պարզ լարվածությունն է: Ընդ որում, խոսքը միայն մարզասրահում ինտենսիվ մարզումների հետևանքների մասին չէ։ Մեջքը կարող է ցավել նստած դիրքում շատ ժամանակ անցկացնելու պատճառով։ Նման ծանրաբեռնվածությունն առաջացնում է մկանային ցավ,- Gazeta.Ru-ին ասել է օրթոպեդիկ սրահի օրթոպեդ-վնասվածքաբան Լև Դունաևը։
Ըստ փորձագետի՝ նրանք, ովքեր անընդհատ աշխատում են համակարգչով, անտեղի լարում են մեջքի մկանները։ Գրասենյակի աշխատողների մեջքը ծռվում է, գլուխն ավելի են մոտեցնում մոնիտորին, ոտքերը խաչում են։ Նման կեցվածքը հանգեցնում է ողնաշարի առանցքի տեղաշարժի, կեցվածքի կորության: Այս վիճակում մկանները ստիպված են մարմինը պահել անբնական դիրքում, որն ավարտվում է նրանց գերաշխատանքով։
«Գերլարվածության արդյունքում՝ մեջքի մկանային սպազմերը սկսում են անհանգստացնել: Դրանց պատճառով է, որ մարդը կարող է ցավ զգալ։ Նման սպազմերը տեղի են ունենում նաև ինտենսիվ սպորտից հետո, քանի որ մարզումների ժամանակ մկանները աշխատում են գերծանրաբեռնվածությամբ», - ասել է օրթոպեդ Դունաևը:
Մեխանիկական մեջքի ցավի մեկ այլ տարածված պատճառ է ողնաշարի ճողվածքը: Կմախքի ուղղահայաց առանցքը բաղկացած է 33-34 ողերից, որոնց միջև կան աճառային գոյացություններ։ Դրանք կոչվում են միջողնային սկավառակներ: Դրանք կատարում են ամբողջ կառուցվածքը կրելու գործառույթը:
Նստակյաց ապրելակերպի, վատ կեցվածքի, անկանոն կամ չափազանց ծանր մարզումների դեպքում սկավառակները մաշվում են, ինչը հանգեցնում է բեռի սխալ բաշխման դրանց մակերեսի վրա:
Օրթոպեդիկ պաթոլոգիայի հայտնաբերման դեպքում բժիշկը նշանակում է անհատական համալիր բուժում: Այն ներառում է կորսետներ կամ կեցվածքը շտկող հագուստ, օրթոպեդիկ ներբանների օգտագործում, ֆիզիոթերապիա, մերսում, բուժական վարժություններ։
Հետազոտությունից հետո բժիշկը, անհրաժեշտության դեպքում, կուղարկի նյարդաբանի կամ հարակից այլ մասնագետների մոտ»,- խորհուրդ է տալիս Դունաևը։